اسلام آباد : نگران صوبائی وزیر تعلیم و قانون گلگت بلتستان بہادر علی خان نے پنڈی میں قائم ایک معروف اسکل ڈویلپمنٹ و اوورسیز ایمپلائمنٹ کمپنی کے دفتر کا دورہ کیا جہاں منیجنگ ڈائریکٹر ولی جان نے ان کا پرتپاک استقبال کیا۔
ملاقات کے دوران نوجوانوں کو ہنر مند بنانے اور انہیں باعزت روزگار کےمواقع فراہم کرنے کے حوالے سےتفصیلی تبادلۂ خیال کیا گیا۔ منیجنگ ڈائریکٹر ولی جان نے ادارے کی کارکردگی پر بریفنگ دیتے ہوئے بتایا کہ کمپنی نوجوان لڑکوں اور لڑکیوں کو مختلف فنی شعبوں میں معیاری تربیت فراہم کر رہی ہے جن میں پلمبنگ ٹیکنیکل ٹریڈز، ڈرائیونگ اور دیگر پیشہ ورانہ مہارتیں شامل ہیں۔
تربیت کی تکمیل کے بعد باصلاحیت نوجوانوں کو بیرونِ ملک روزگار کے مواقع فراہم کیے جاتے ہیں جس کے نتیجے میں ہزاروں نوجوان مختلف ممالک میں باعزت روزگار کما کر اپنے خاندانوں کی کفالت کر رہے ہیں اور ملکی معیشت میں بھی مثبت کردار ادا کر رہے ہیں۔
نگران وزیر نے ادارے کی خدمات کو سراہتے ہوئے کہا کہ اس نوعیت کے اقدامات گلگت بلتستان کے نوجوانوں کے لیے امید کی کرن ہیں۔
انہوں نے خصوصی طور پر مطالبہ کیا کہ گلگت کے علاوہ دیامر، استور، غزر اور سکردو میں بھی ادارے کے دفاتر اور
تربیتی مراکز قائم کیے جائیں تاکہ دور دراز اور پسماندہ علاقوں کے نوجوانوں کو بھی یکساں مواقع میسر آ سکیں۔
انہوں نے کہا کہ حکومت نوجوانوں کو خود کفیل بنانے اور بے روزگاری کے خاتمے کے لیے ہر ممکن تعاون فراہم کرے
گی جبکہ نجی شعبے کے ساتھ اشتراک سے ہنر مند افرادی قوت تیار کرنا وقت کی اہم ضرورت ہے۔
منیجنگ ڈائریکٹر ولی جان نے اس تجویز کا خیرمقدم کرتے ہوئے یقین دہانی کرائی کہ مستقبل میں گلگت بلتستان کے دیگر اضلاع تک اپنے نیٹ ورک کو وسعت دینے کے لیے عملی اقدامات کیے جائیں گے تاکہ زیادہ سے زیادہ نوجوان ہنر مند بن کر قومی و بین الاقوامی سطح پر باعزت روزگار حاصل کر سکیں۔