چلاس: دیامر میں ٹی بی ادویات ناپید، علاج میں تعطل سے قیمتی جانیں خطرے میں ۔
تفصیلات کے مطابق ضلع دیامر میں تپِ دق (ٹی بی) جیسے موذی اور متعدی مرض کی سرکاری ادویات کی شدید قلت نے صحتِ عامہ کے نظام کو ہلا کر رکھ دیا ہے۔ ڈسٹرکٹ ہیڈکوارٹر ہسپتال چلاس اور دیگر سرکاری صحت مراکز میں ٹی بی کی ادویات کی عدم دستیابی کے باعث مریضوں کو شدید مشکلات کا سامنا ہے جبکہ علاج میں تعطل سے مریضوں کی زندگیاں براہِ راست خطرے میں پڑ گئی ہیں۔
متاثرہ مریضوں اور ان کے اہلِ خانہ کے مطابق کئی ہفتوں سے سرکاری ہسپتالوں میں ٹی بی کی ادویات دستیاب نہیں، جس کے باعث مریض یا تو مہنگا نجی علاج کروانے پر مجبور ہیں یا پھر علاج ادھورا چھوڑنے پر مجبور ہو چکے ہیں۔
غریب طبقے سے تعلق رکھنے والے مریضوں کے لیے باقاعدہ علاج جاری رکھنا ناممکن بنتا جا رہا ہے۔
طبی ماہرین خبردار کرتے ہیں کہ ٹی بی کا علاج مخصوص مدت اور مکمل تسلسل کے ساتھ کرنا نہایت ضروری ہے۔
علاج میں معمولی سا ناغہ بھی مرض کو مزید پیچیدہ بنا سکتا ہے اور مریض میں ڈرگ ریزسٹنٹ ٹی بی پیدا ہونے کا خدشہ بڑھ جاتا ہے، جو نہ صرف مریض بلکہ پورے معاشرے کے لیے ایک بڑا خطرہ ہے۔
ماہرین کے مطابق اگر صورتحال پر فوری قابو نہ پایا گیا تو ضلع دیامر میں ٹی بی کے پھیلاؤ میں خطرناک حد تک اضافہ ہو سکتا ہے۔