ٹیکنو نے پاکستان میں اپنا نیا اسمارٹ فون ’’کیمن 50 الٹرا‘‘ پیش کردیا ہے جو تیز رفتار کارکردگی اور اعلیٰ معیار کی فوٹوگرافی کے لیے تیار کیا گیا ہے۔ یہ فون جدید صارفین کی ضروریات کو مدنظر رکھتے ہوئے متعارف کرایا گیا ہے۔
یہ اسمارٹ فون جدید رفتار کے حامل چپ سیٹ سے لیس ہے جس سے انٹرنیٹ کے استعمال، ویڈیوز اور گیمز کا تجربہ ہموار ہوجاتا ہے۔ اس میں 12 جی بی ریم دی گئی ہے جسے بڑھایا بھی جاسکتا ہے جس سے بیک وقت کئی ایپس آسانی سے چلتی ہیں۔
فون میں سونی کا 50 میگا پکسل کیمرہ دیا گیا ہے جو دن اور رات دونوں میں واضح تصاویر لینے کی صلاحیت رکھتا ہے۔ اس کے ساتھ اضافی کیمرے بھی شامل ہیں جو قریب اور دور کے مناظر کو بہتر انداز میں محفوظ کرتے ہیں جب کہ فرنٹ کیمرہ بھی اعلیٰ معیار کی سیلفی فراہم کرتا ہے۔
ڈیزائن، بیٹری اور دیگر سہولیات
یہ فون پانی اور گرد سے محفوظ ڈیزائن کے ساتھ پیش کیا گیا ہے جب کہ اس میں بڑی اور واضح اسکرین دی گئی ہے جو دیکھنے کا بہترین تجربہ فراہم کرتی ہے۔
6 ہزار 500 ایم اے ایچ کی طاقتور بیٹری کے ساتھ یہ فون طویل استعمال کے لیے موزوں ہے جب کہ تیز چارجنگ کی سہولت بھی موجود ہے۔ اس کے علاوہ مصنوعی ذہانت پر مبنی فیچرز صارفین کے روزمرہ کاموں کو مزید آسان بناتے ہیں۔
قیمت اور دستیابی
کیمن 50 الٹرا پاکستان میں ایک لاکھ 19 ہزار 999 روپے میں دستیاب ہے اور تمام نیٹ ورکس پر بخوبی کام کرتا ہے۔ کمپنی کی جانب سے اس پر وارنٹی بھی فراہم کی جارہی ہے۔