ایران پر حملوں اور اسرائیل کی حمایت کے معاملے پر بھارتی وزیر اعظم کو اندرونِ ملک اور بین الاقوامی سطح پر کڑی تنقید کا سامنا ہے۔
بھارتی وزیر اعظم نریندر مودی کے حالیہ اسرائیل نواز مؤقف اور دورۂ اسرائیل پر اپوزیشن جماعتوں نے سخت ردعمل دیا ہے۔ اپوزیشن کا کہنا ہے کہ اس اقدام سے بھارت کی نام نہاد غیر جانبداری کا تاثر مجروح ہوا ہے۔
عالمی جریدے بلومبرگ کے مطابق بھارتی اپوزیشن رہنماؤں نے مؤقف اختیار کیا کہ مودی کے حالیہ دورے نے ایران پر فضائی حملوں کی تائید کا تاثر دیا، جس سے خطے میں کشیدگی میں اضافہ ہوا۔
اپوزیشن جماعت کانگریس کے ترجمان نے بیان میں کہا کہ ایران پر حملوں پر مودی کا ردعمل بھارت کی روایتی سفارتی اقدار اور قومی مفادات سے انحراف کے مترادف ہے۔
بلومبرگ کی رپورٹ کے مطابق ایران میں بڑھتے بحران سے بھارتی معیشت کو غیر یقینی صورتحال کا سامنا ہو سکتا ہے، خصوصاً تیل کی قیمتوں میں اضافے اور تجارتی خسارے کے تناظر میں۔
رپورٹ میں مقبوضہ جموں و کشمیر کی صورتحال کا حوالہ دیتے ہوئے کہا گیا ہے کہ مسلم اکثریتی خطے میں سکیورٹی پالیسیوں پر پہلے ہی عالمی سطح پر سوالات اٹھائے جاتے رہے ہیں، اور حالیہ علاقائی کشیدگی نے ان مباحث کو مزید تقویت دی ہے۔
عالمی ماہرین کا کہنا ہے کہ کسی ایک فریق کی کھلی حمایت خطے میں سفارتی توازن کو متاثر کر سکتی ہے۔ ان کے مطابق بھارت کو اپنی طویل مدتی معاشی اور تزویراتی ترجیحات کو مدنظر رکھتے ہوئے محتاط سفارتکاری اپنانا ہوگی۔
تجزیہ کاروں کے مطابق موجودہ علاقائی بحران میں کسی بھی بڑے ملک کا واضح جھکاؤ خطے کے طاقت کے توازن اور عالمی منڈیوں پر اثر انداز ہو سکتا ہے۔