اسلام آباد:گلگت بلتستان چیف کورٹ گلگت کمپلیکس کی تعمیر سے متعلق منصوبے کی فزیبلٹی پر نیشنل انجینئرنگ سروسز پاکستان (نسپاک) کی ٹیکنیکل ٹیم کی کنسلٹنٹ میڈم روبینہ حسین نے اسلام آباد میں جی بی ہاؤس میں چیف جسٹس گلگت بلتستان چیف کورٹ جسٹس علی بیگ کو تفصیلی بریفنگ دی۔
بریفنگ کے موقع پر ڈائریکٹر جنرل جوڈیشل اکیڈمی/ڈویلپمنٹ چیف کورٹ غلام عباس چوپا، چیف انجینئر عبدالہادی، ایگزیکٹو انجینئر تعمیرات یاسر قزلباش، پی آر او و ڈویلپمنٹ آفیسر چیف کورٹ بہادر جمیل شریک تھے، جبکہ سیکرٹری تعمیرات سجاد حیدر نے ویڈیو لنک کے ذریعے اجلاس میں شرکت کی۔
اس موقع پر چیف جسٹس علی بیگ نے کہا کہ چیف کورٹ کی مستقل عمارت کی عدم موجودگی کے باعث انتظامی امور کی انجام دہی اور سائلین کو بروقت انصاف کی فراہمی میں شدید مشکلات کا سامنا ہے، جس کا فوری تدارک ناگزیر ہوچکا ہے۔
انہوں نے نسپاک کو سختی سے ہدایت کی کہ منصوبے کا پی سی ون ہنگامی بنیادوں پر تیار کیا جائے تاکہ اسے متعلقہ فورم سے جلد از جلد منظور کرایا جاسکے۔
چیف جسٹس نے مزید کہا کہ اراضی کی عدم فراہمی کے باعث منصوبہ طویل عرصے سے التواء کا شکار ہے، تاہم یہ ایک عوامی نوعیت کا اہم منصوبہ ہے جس کی تکمیل سے عدلیہ، وکلاء اور عام سائلین کو یکساں طور پر سہولت حاصل ہوگی اور نظامِ انصاف کی بہتری میں نمایاں کردار ادا ہوگا۔
انہوں نے کنسلٹنٹ کو ہدایت دی کہ چیف کورٹ کمپلیکس کے منصوبے میں وکلاء کے لیے جدید بار روم، جامع لائبریری، ایڈووکیٹ جنرل کے لیے علیحدہ دفتر، سائلین کے لیے کشادہ انتظار گاہ، مناسب پارکنگ ایریا اور دیگر ضروری سہولیات کو بھی شامل کیا جائے تاکہ ایک مربوط اور جدید عدالتی کمپلیکس کی تعمیر ممکن بنائی جاسکے۔
چیف جسٹس علی بیگ نے اس امر پر زور دیا کہ چیف کورٹ کمپلیکس کی تکمیل عدلیہ کی اولین ترجیح ہے اور اس ضمن میں مزید تاخیر ہرگز برداشت نہیں کی جائے گی۔
انہوں نے ہدایت کی کہ منصوبے کی ڈرائنگ اور ڈیزائن ڈائریکٹر جنرل جوڈیشل اکیڈمی و ڈویلپمنٹ غلام عباس چوپا کی مشاورت سے حتمی شکل دے کر 27 فروری تک منظوری کے لیے پیش کیا جائے، تاکہ عملی پیش رفت کا آغاز کیا جاسکے۔