اسلام آباد: پاکستان نے پہلے مرحلے میں 500 بنگلا دیشی طلبا کو قومی جامعات میں داخلہ دینے کا اعلان کر دیا۔
پاکستان اور بنگلا دیش کے درمیان تعلیمی میدان میں اہم معاہدہ طے پا گیا۔ جس کے تحت پہلے مرحلے میں 500 بنگلا دیشی طلبا کو پاکستانی جامعات میں داخلے فراہم کیے جائیں گے۔
ذرائع ہائر ایجوکیشن کمیشن (ایچ ای سی) کے مطابق ان 500 بنگلا دیشی طلبا کو پاکستان کے مختلف شہروں میں قائم مختلف یونیورسٹیوں میں داخلے دیئے جائیں گے۔ جہاں وہ اسکالرشپ پر اعلیٰ تعلیم حاصل کریں گے۔ طلبا کو انڈر گریجویشن پروگرامز میں فُلی فنڈڈ داخلے فراہم کیے جائیں گے۔
ایچ ای سی ذرائع کے مطابق داخلوں کے لیے بنگلا دیشی طلبا کی بڑی تعداد نے انٹری ٹیسٹس میں شرکت کی۔ یہ انٹری ٹیسٹس ایچ ای سی کے زیرِ اہتمام چٹا گانگ، ڈھاکا اور راج شاہی میں منعقد کیے گئے تھے۔
ذرائع کا کہنا ہے کہ پاکستان اور بنگلا دیش کے درمیان اس اسکالرشپ پروگرام کو علامہ اقبال کے نام سے منسوب کیا گیا ہے۔ انٹری ٹیسٹس کے موقع پر بنگلا دیشی نوجوانوں نے پاکستانی حکام کا گرمجوشی سے استقبال کیا اور ان کے ساتھ تصاویر بھی بنوائیں۔
دونوں ممالک کے درمیان یہ تعلیمی معاہدہ تعلیمی تعاون اور نوجوانوں کے تبادلوں کو فروغ دینے کی جانب ایک اہم پیش رفت قرار دیا جا رہا ہے۔