مردان کے علاقے رستم کی یونین کونسل ننگ آباد میں پہاڑوں کی کٹائی کے دوران اچانک تودہ گرنے سے 9 افراد جاں بحق ہو گئے جبکہ متعدد افراد ملبے تلے دب گئے۔
ریسکیو حکام کے مطابق واقعہ کے فوری بعد امدادی ٹیمیں جائے وقوعہ پر پہنچ گئیں اورریسکیو آپریشن کا آغاز کردیا گیا۔
حکام کا کہنا ہے کہ امدادی کارروائیوں کے دوران اب تک 9 افراد کی لاشیں اور3 زخمیوں کوملبے سے نکال لیا گیا ہے جبکہ دیگرافراد کی تلاش کیلئے آپریشن تیزی سے جاری ہے، زخمیوں کو فوری طبی امداد کیلئے قریبی اسپتال منتقل کردیا گیا ہے۔
ریسکیو ذرائع کے مطابق تودہ گرنے کا واقعہ پہاڑ کی کٹائی کے دوران پیش آیا، جس کے باعث مٹی اور پتھروں کا بڑا حصہ اچانک نیچے آ گرا۔
حکام نے خدشہ ظاہر کیا ہے کہ ملبے تلے مزید افراد بھی دبے ہو سکتے ہیں، جس کے پیش نظرآپریشن میں مزید نفری اور مشینری شامل کردی گئی ہے۔