دل کی صحت کے لیے دوپہر کے کھانے میں چار بہترین غذائیں

دوپہر کے وقت جو خوراک آپ لیتے ہیں، وہ نہ صرف آپ کی توانائی کو متاثر کرتی ہے بلکہ دل کی صحت پر بھی اثر ڈال سکتی ہے۔

ماہرین کا کہنا ہے کہ اکثر لوگ اس وقت میٹھے اسنیکس کھاتے ہیں یا کھانا چھوڑ دیتے ہیں، جو دل کی صحت کے لیے نقصان دہ ہو سکتا ہے کیونکہ یہ خون میں شکر کی سطح کو متاثر کرتا ہے اور طویل مدت میں میٹابولک صحت کو خراب کر سکتا ہے۔

ایٹنگ ویل نامی جرنل میں شائع ہونے والی تحقیق کے مطابق ماہرین کا کہنا ہے کہ متوازن اور دل دوست غذائیں جیسے خشک میوہ جات، بیج، فائبر اور ہول گرین کھانے دل کی صحت کو بہتر بنانے، کولیسٹرول کنٹرول میں مدد دینے اور زیادہ دیر تک پیٹ بھرے رکھنے میں مددگار ہیں۔

 بغیر نمک کے خشک میوہ جات

بادام اور اخروٹ جیسے میوہ جات میں غیر سیر شدہ چکنائی، فائبر اور پودوں کے مرکبات ہوتے ہیں جو کولیسٹرول کم کرنے اور سوزش کو کم کرنے میں مددگار ہیں۔

ڈاکٹر کنال لال کے مطابق بادام ذائقہ دار اور کرنچی اسنیک ہیں جو دل کی صحت کے لیے بہترین ہیں۔ اخروٹ میں پلانٹ بیسڈ اومیگا-3 فیٹس ہوتے ہیں جو دل کی بیماری کے خطرے کو کم کرنے میں مددگار ہیں۔ ایک مناسب حصہ ایک مٹھی یا ایک اونس ہوتا ہے۔

 سبزیاں 

سبزیاں دوپہر کے اسنیک کے لیے بہترین ہیں۔ ڈاکٹر جوہانا کانٹریراس کہتی ہیں کہ سیلری یا گاجر ہومس کے ساتھ دل کے لیے بہترین اسنیک ہیں۔ سبزیوں میں فائبر موجود ہوتا ہے جو کولیسٹرول کو کم کرنے اور دیر تک پیٹ بھرے رکھنے میں مدد دیتا ہے۔

 پھل

بیریز اور آم جیسے پھل فائبر، معدنیات اور اینٹی آکسیڈنٹس فراہم کرتے ہیں جو دل کی نالیوں کو صحت مند رکھتے ہیں اور آکسیڈیٹیو سٹریس کم کرتے ہیں۔ ڈاکٹر کانٹریراس کے مطابق بیریز کے ساتھ دہی بہترین اسنیک ہے۔ آم میں فائبر، پوٹاشیم اور وٹامن سی موجود ہے جو دل کی صحت کو سپورٹ کرتے ہیں۔ پھل کے ساتھ پروٹین یا صحت مند چکنائی لینا بہتر ہے تاکہ خون میں شکر کی سطح مستحکم رہے۔

 ہول گرین ٹوسٹ یا کریکرز کے ساتھ ایوکاڈو

ہول گرین بریڈ اور کریکرز فائبر اور سست ہضم کاربوہائیڈریٹس فراہم کرتے ہیں، جو توانائی کو برقرار رکھتے ہیں۔ ایوکاڈو کے ساتھ یہ دل کے لیے مزید فائدہ مند ہوتا ہے کیونکہ اس میں مونو انسیچوریٹڈ فیٹس، فائبر اور پوٹاشیم ہوتا ہے، جو کولیسٹرول کو کم کرنے اور بلڈ پریشر کو کنٹرول کرنے میں مدد دیتا ہے۔

دل دوست اسنیک بنانے کے طریقے

فائبر سے بھرپور کاربوہائیڈریٹس کو پروٹین اور صحت مند چکنائی کے ساتھ ملا کر خون میں شکر اور کولیسٹرول کو مستحکم رکھیں۔ زیادہ سیر شدہ چکنائی والے کھانوں، پروسیسڈ میٹ، میٹھے، آئس کریم اور فل فیٹ ڈیری کو کم کریں۔ اسنیکس پہلے سے تیار کریں تاکہ فوری اور شوگر سے بھرپور کھانوں سے بچا جاسکے۔