سکردو: وزیرِ اعظم پاکستان کی جانب سے گلگت بلتستان کے لیے شروع کی گئی فری سولر پینل سکیم کے تحت درخواست دہندگان میں سولر پینلز کی شفاف تقسیم کے لیے ڈیجیٹل قرعہ اندازی ڈسٹرکٹ ایڈمنسٹریشن کمپلیکس سکردو میں منعقد ہوئی۔ تقریب میں ڈپٹی کمشنر سکردو، ڈائریکٹر پی ایم آر یو طلحہ اسد، ایڈیشنل ڈپٹی کمشنر نثار حسین، اسسٹنٹ کمشنر سکردو احسان الحق، متعلقہ محکموں کے افسران اور میڈیا نمائندگان نے شرکت کی۔ڈپٹی کمشنر سکردو حمزہ مراد نے بٹن دبا کر ڈیجیٹل بیلٹنگ کے عمل کا باضابطہ آغاز کیا۔
تقریب سے خطاب کرتے ہوئے ڈپٹی کمشنر نے کہا کہ فری سولر پینل سکیم کے پہلے مرحلے کے تحت ضلع سکردو سے سولر پینلز کے حصول کے لیے مجموعی طور پر 9,301 درخواستیں موصول ہوئیں، جن میں سے 2,677 درخواست دہندگان ڈیجیٹل قرعہ اندازی کے ذریعے سولر پینلز حاصل کرنے میں کامیاب قرار پائے۔ ان میں 2,275 گھریلو صارفین جبکہ 402 آئی ٹی و کاروباری صارفین شامل ہیں۔
انہوں نے واضح کیا کہ وزیرِ اعظم پاکستان فری سولر پینل سکیم برائے گلگت بلتستان کے تحت ضلع سکردو کے لیے 8.2 میگاواٹ کا کوٹہ مختص کیا گیا تھا، جس میں سے 6 میگاواٹ گھریلو صارفین جبکہ 2.2 میگاواٹ آئی ٹی اور کاروباری صارفین کے لیے رکھا گیا تھا۔
ڈپٹی کمشنر نے مزید کہا کہ اس سکیم کے تحت سکردو میں نجی سطح پر بجلی کی پیداوار میں تقریباً 7.7 میگاواٹ کا اضافہ ہوگا، جو شہر کی بجلی کی طلب کو پورا کرنے میں معاون ثابت ہوگا۔ انہوں نے کہا کہ سکیم کا دوسرا مرحلہ بھی جلد شروع کردیا جائے گا، جس کے لیے محکمہ واٹر اینڈ پاور میں ایک کمیٹی تشکیل دی گئی ہے جو آئندہ چند روز میں پینلز کی تقسیم کے حوالے سے طریقۂ کار واضح کرے گی اور تقسیم کا مرحلہ شروع ہو جائے گا۔
اہل افراد کے نام اور فہرست پی ایم آر یو جی بی کی ویب سائٹ پر دستیاب ہیں جہاں سے اپنا نام چیک کیا جاسکتا ہے.
https://www.solar.pmrugb.gov.pk/eligible