صدرِ مملکت آصف علی زرداری نے ایرانی سپریم لیڈر آیت اللہ سید علی خامنہ ای کی شہادت پر گہرے رنج و غم کا اظہار کرتے ہوئے ایرانی حکومت اور عوام سے دلی تعزیت کا اظہار کیا ہے۔
صدر مملکت نے اپنے بیان میں کہا کہ آیت اللہ خامنہ ای اور دیگر ایرانی قیادت کی شہادت پر پورا عالمِ اسلام سوگوار ہے۔ انہوں نے اس دکھ کی گھڑی میں برادر اسلامی ملک ایران کے ساتھ مکمل یکجہتی اور ہر ممکن تعاون کی یقین دہانی بھی کرائی۔
صدر زرداری نے ریاستوں کے سربراہان کو نشانہ بنائے جانے کے بڑھتے ہوئے واقعات پر شدید تشویش ظاہر کرتے ہوئے کہا کہ ایسے اقدامات عالمی امن اور استحکام کے لیے نہایت خطرناک رجحان کی عکاسی کرتے ہیں۔
انہوں نے دعا کی کہ اللہ تعالیٰ شہداء کے درجات بلند فرمائے، مرحومین کے اہلِ خانہ کو صبرِ جمیل عطا کرے اور ایرانی عوام کو اس سانحے کو برداشت کرنے کی ہمت دے۔