ضلع نگر میں موسمِ بہار کی شجرکاری مہم کا آغاز ضلعی ہیڈکوارٹر میں ایک پروقار تقریب کے ذریعے کیا گیا۔ اس موقع پر ڈپٹی کمشنر نگر اصغر خان احمد نے پودا لگا کر مہم کا افتتاح کیا اور شجرکاری کی اہمیت پر زور دیا۔
ڈپٹی کمشنر نے اپنے خطاب میں کہا کہ درخت ماحولیاتی آلودگی کے خاتمے، موسمیاتی تبدیلیوں کے اثرات میں کمی، قدرتی حسن کے فروغ اور آئندہ نسلوں کے محفوظ مستقبل کے لیے نہایت ضروری ہیں۔ انہوں نے سرکاری محکموں، تعلیمی اداروں، سماجی تنظیموں اور عوام الناس پر زور دیا کہ وہ زیادہ سے زیادہ پودے لگا کر اور ان کی دیکھ بھال کو یقینی بنا کر اس قومی فریضے میں بھرپور کردار ادا کریں۔
تقریب میں مختلف محکموں کے افسران، عملہ اور شہریوں کی کثیر تعداد نے شرکت کی اور عزم کا اظہار کیا کہ ضلع نگر کو سرسبز و شاداب بنانے کے لیے مشترکہ کاوشیں جاری رکھی جائیں گی۔ موسمِ بہار کی یہ شجرکاری مہم ضلع بھر میں جاری رہے گی، جس کے تحت ہزاروں پودے لگانے کا ہدف مقرر کیا گیا ہے۔