ڈیووس: عالمی اقتصادی فورم کے موقع پر پاکستان پویلین میں وزیراعظم شہباز شریف نے خطاب کرتے ہوئے کہا کہ الحمد للہ پاکستان مشکل حالات سے باہر آچکا ہے اور ملک اقتصادی استحکام کی راہ پر گامزن ہے۔
وزیراعظم نے بتایا کہ پالیسی ریٹ 22.5 فیصد سے کم ہوکر اب 10.5 فیصد ہوگیا ہے جس سے معیشت پر مثبت اثرات مرتب ہو رہے ہیں۔
وزیراعظم شہباز شریف نے کہا کہ سماجی اشاریے بہتر بنانے کے لیے مشترکہ اور مسلسل کوششیں جاری ہیں اور پاکستان کو برآمدات پر مبنی ترقی کی راہ اپنانا ہوگی۔
ان کا کہنا تھا کہ ملکی نظام میں بنیادی ڈھانچہ جاتی اصلاحات کی گئی ہیں اور ریونیو کلیکشن سسٹم مکمل طور پر ڈیجیٹل کردیا گیا ہے۔
انہوں نے گزشتہ سال کی زرعی برآمدات کو انتہائی حوصلہ افزا قرار دیا اور کہا کہ معدنیات کے شعبے میں بڑی سرمایہ کاری جاری ہے جب کہ گلگت بلتستان، آزاد جموں و کشمیر، خیبرپختونخوا اور بلوچستان میں قدرتی وسائل کی بدولت ترقی کے نئے مواقع کھلے ہیں۔
وزیراعظم نے آئی ٹی اور دیگر برآمدات میں حوصلہ افزا ترقی کا بھی ذکر کیا اور کہا کہ آئی ٹی کے شعبے کی برآمدات کے لیے تیزی سے آگے بڑھ رہے ہیں۔
انہوں نے کہا نوجوانوں کو ہنر مند بنانے اور تربیت فراہم کرنے کے لیے متعدد پروگرام شروع کیے گئے ہیں جن میں نیوٹیک نوجوانوں کو عالمی معیار کے سرٹیفکیٹ کے ساتھ تربیت فراہم کررہا ہے۔ اس سے نوجوان خلیجی ملکوں اور دنیا کے دیگر حصوں میں ملازمت کے مواقع کے لیے تیار ہیں۔
انہوں نے مزید کہا کہ پاکستان انسداد دہشت گردی میں بھی مختلف ملکوں کے ساتھ تعاون کررہا ہے اور اب معاشی استحکام حاصل ہوچکا ہے، اب اگلی منزل صرف ترقی ہے۔