امریکی خلائی ادارے ناسا نے دنیا بھر میں خلا سے دلچسپی رکھنے والے افراد کے لیے ایک انوکھا اور یادگار موقع متعارف کرایا ہے۔
بین الاقوامی میڈیا رپورٹس کے مطابق ناسا نے واضح کیا ہے خلا سے دلچسپی رکھنے والے افراد اپنا نام چاند تک پہنچا سکیں گے۔ اس مقصد کے لیے باقاعدہ طور پر رجسٹریشن کا آغاز کر دیا گیا ہے، موصول ہونے والے ناموں کو ایک خصوصی ڈیجیٹل میموری ڈیوائس میں محفوظ کر کے چاند کی جانب روانہ کیا جائے گا، تاکہ عام افراد بھی اس تاریخی خلائی مشن کا حصہ بن سکیں۔
ناسا کی جانب سے سوشل میڈیا پلیٹ فارم ایکس پر جاری بیان میں عوام کو دعوت دی گئی ہے کہ وہ اس موقع سے فائدہ اٹھاتے ہوئے اپنا نام خلائی تاریخ میں درج کروائیں۔ ادارے کے مطابق یہ نام ایک ایس ڈی کارڈ میں محفوظ کیے جائیں گے، جسے آرٹیمس دوم مشن کے دوران خلائی جہاز اورین کے ساتھ روانہ کیا جائے گا، جو چاند کے گرد مدار میں گردش کرے گا۔
رپورٹس کے مطابق آرٹیمس دوم مشن کے لیے راکٹ کی تیاری لانچ پیڈ پر جاری ہے، جبکہ اس مشن کی روانگی فروری میں متوقع ہے۔ تقریباً 10 روزہ اس خلائی سفر کے دوران ناسا کے 4 تربیت یافتہ خلا نورد چاند کے گرد چکر مکمل کرنے کے بعد زمین پر واپس آئیں گے۔ یہ مشن انسان کے چاند کی جانب دوبارہ سفر کی جانب ایک اہم سنگِ میل سمجھا جا رہا ہے۔
یہ خلائی مہم ناسا کے اس طویل المدتی منصوبے کا حصہ ہے، جس کا مقصد نصف صدی سے زائد عرصے کے بعد انسان کو دوبارہ چاند تک پہنچانا ہے۔ اگرچہ اس مرحلے میں چاند کی سطح پر لینڈنگ شامل نہیں، تاہم اسے مستقبل میں انسانی لینڈنگ کی تیاریوں کے لیے ایک بنیادی قدم قرار دیا جا رہا ہے۔
ناسا کے مطابق اس اقدام کا مقصد خلائی تحقیق کے ساتھ عوام کی وابستگی کو فروغ دینا اور نئی نسل کو سائنس اور ٹیکنالوجی کے شعبوں کی جانب متوجہ کرنا ہے، تاکہ خلا کی کھوج محض اداروں تک محدود نہ رہے بلکہ عام انسان بھی خود کو اس تاریخی سفر کا حصہ محسوس کر سکے۔