نئی دہلی: بالی ووڈ کے لیجنڈ اداکار گووندا کی اہلیہ سنیتا آہوجا نے علیحدگی کی خبروں کو مسترد کر دیا۔
غیر ملکی خبر رساں ایجنسی کے مطابق بالی ووڈ کے لیجنڈری اداکار گووندا کی اہلیہ سنیتا آہوجا نے حال ہی میں ایک پوڈکاسٹ میں اپنی ازدواجی زندگی، شوہر سے تعلقات اور مبینہ افیئرز سے متعلق خبروں پر کھل کر گفتگو کی۔
سنیتا آہوجا نے واضح الفاظ میں گووندا سے علیحدگی اور طلاق کی خبروں کو بے بنیاد قرار دیتے ہوئے کہا کہ نہ تو ان کی طلاق ہوئی ہے۔ اور نہ ہی ایسا کوئی ارادہ موجود ہے۔
سنیتا آہوجا نے کہا کہ وہ اور گووندا آج بھی ایک ساتھ رہ رہے ہیں۔ اور ان کا رشتہ باضابطہ طور پر قائم ہے۔ شادی کے طویل سفر میں اتار چڑھاؤ آتے رہتے ہیں، تاہم ان کے تعلقات کی بنیاد مضبوط ہے۔
شوہر کی زندگی میں دیگر خواتین سے منسوب خبروں پر بات کرتے ہوئے انہوں نے کہا کہ وہ ایسے معاملات کو مکمل طور پر نظرانداز نہیں کرتیں۔ اگر کسی مرحلے پر بے وفائی ثابت ہوئی تو وہ اسے معاف نہیں کریں گی۔ تاہم اس وقت ان کا رشتہ اعتماد پر قائم ہے۔
سنیتا آہوجا نے شوخ مگر سنجیدہ انداز میں خاندانی ذمہ داریوں کا ذکر بھی کیا۔ انہوں نے خاص طور پر بیٹے یش وردھن آہوجا کے کیریئر سے متعلق بات کرتے ہوئے گووندا پر ناراضی کا اظہار کیا۔ اور کہا کہ وہ بیٹے کے لیے وہ کردار ادا نہیں کر رہے جس کی انہیں توقع تھی۔
واضح رہے کہ گووندا اور سنیتا آہوجا کی شادی 1987 میں ہوئی تھی۔ اور ان کے دو بچے بیٹی ٹینا آہوجا اور بیٹا یش وردھن آہوجا ہیں۔ جو بالی ووڈ میں اپنی شناخت بنانے کی کوشش کر رہے ہیں۔