اسلام آباد :بلتستان یونیورسٹی سکردو نے خطے کے نوجوانوں اور مقامی آبادی کو خود مختار بنانے کے لیے ایک اہم فیصلہ کیا ہے، جس کے تحت بلتستان کے چاروں اضلاع میں ٹیکنیکل انکیوبیشن سینٹرز کو فوری طور پر فعال کیا جائے گا۔
یہ فیصلہ اسلام آباد میں وائس چانسلر پروفیسر ڈاکٹر مسعود اختر کی زیرِ صدارت منعقدہ ایک اعلیٰ سطح کے اجلاس میں کیا گیا۔ اجلاس میں یونیورسٹی کے شعبہ اوریک (ORIC) اور بزنس انکیوبیشن سینٹر (BIC) کے ذمہ دادان نے شرکت کی۔
اس منصوبے کا بنیادی مقصد مقامی کمیونٹی کو سائنس، فنون اور سوشل سائنسز جیسے شعبوں میں نہ صرف آگاہی فراہم کرنا ہے بلکہ انہیں جدید دور کے تقاضوں کے مطابق عملی تربیت دے کر روزگار کے بہتر مواقع فراہم کرنا ہے۔
اجلاس کے دوران ڈائریکٹر اوریک ڈاکٹر منور علی عباس نے بریفنگ دیتے ہوئے بتایا کہ ان سینٹرز کے ذریعے مقامی لوگوں کو مختلف ہنرمندی کے کاموں میں مصروف کیا جائے گا، جن میں لائیو اسٹاک (مال مویشی) اور ویٹرنری میڈیسن جیسے اہم شعبوں پر خصوصی توجہ دی جائے گی۔
ان مراکز میں مختلف شعبہ ہائے زندگی کے ماہرین کو مدعو کیا جائے گا جو مقامی نوجوانوں کی تربیت سازی کریں گے تاکہ وہ اپنے پیروں پر کھڑے ہو سکیں۔
وائس چانسلر پروفیسر ڈاکٹر مسعود اختر نے ان سینٹرز کو جلد از جلد فعال کرنے کی ہدایات جاری کرتے ہوئے کہا کہ یونیورسٹی اس مقصد کے لیے اپنا بھرپور تعاون فراہم کرے گی تاکہ دور افتادہ علاقوں کے لوگ بھی جدید تعلیم اور ٹیکنیکی مہارتوں سے مستفید ہو سکیں۔