کراچی: آغا خان یونیورسٹی (اے کے یو) کے انسٹیٹیوٹ فار گلوبل ہیلتھ اینڈ ڈویلپمنٹ (آئی جی ایچ ڈی) نے پاکستان کے معروف ماہرِ تعمیرات، منصوبہ سازوں، ماہرینِ صحتِ عامہ، ڈویلپمنٹ اسپیشلسٹس اور سرکاری نمائندوں کو ایک پلیٹ فارم پر جمع کیا تاکہ ملک کو درپیش اہم ترین چیلنج—موسمیاتی تبدیلی کے بڑھتے ہوئے اثرات کے مقابلے کے لیے گھروں، محلّوں اور عوامی نظام کی از سرِ نو تعمیر—پر غور کیا جا سکے، خواہ یہ شہری علاقوں میں ہو یا دیہی۔
یہ مکالمہ آئی جی ایچ ڈی کی سالانہ کانفرنس “کلائمٹ چینج اینڈ دی بلٹ انوائرمنٹ” کے دوران منعقد ہوا، جسے سسٹین ایبل ڈویلپمنٹ سولوشنز نیٹ ورک (ایس ڈی ایس این) پاکستان کے اشتراک سے پروفیسر ذوالفقار اے بھٹہ، بانی ڈائریکٹر آئی جی ایچ ڈی، کی سربراہی میں منعقد کیا گیا۔ اس سال کا موضوع “کلائمٹ چینج اینڈ دی بلٹ انوائرمنٹ: کم آمدنی والے طبقات میں لچک اور موافقت کے فروغ” نے شواہد، حل اور جدید طریقوں پر مبنی ایک جامع دن کی بنیاد فراہم کی۔