25 سال کی عمر کے بعد جسم ہر سال تقریباً ایک فیصد کم کولیجن بنانا شروع کر دیتا ہے یہی کولیجن جلد کی مضبوطی، لچک اور بھرپور ساخت کے لیے بنیادی حیثیت رکھتا ہے۔
وقت گزرنے کے ساتھ کولیجن کی کمی باریک لکیروں، مدھم چمک اور ڈھیلی جلد کی صورت میں ظاہر ہونے لگتی ہے۔ یہ عمل قدرتی ہے جسے مکمل طور پر روکا نہیں جا سکتا لیکن مناسب دیکھ بھال کے ذریعے اس کی رفتار کم کی جا سکتی ہے۔ اس کے لیے ضروری ہے کہ جلد کی حفاظت کو روزمرہ زندگی کا حصہ بنایا جائے اور چند سادہ مگر مؤثر عادات اپنائی جائیں۔
جلد کی قبل از وقت بڑھتی عمر اور جھریوں کے خدشے کو کم کرنے کے لیے ماہرینِ صحت نے روزمرہ معمولات میں چند اہم تبدیلیوں کو ضروری قرار دیا ہے۔
سورج سے بچاؤ
کولیجن کو سب سے زیادہ نقصان سورج کی الٹرا وائلٹ شعاعوں سے پہنچتا ہے۔ چاہے موسم ابر آلود ہو یا آپ کھڑکی کے قریب بیٹھے ہوں، دھوپ جلد کے اندرونی ڈھانچے کو متاثر کرتی ہے اور کولیجن کو تیزی سے کم کرتی ہے۔ اسی لیے سن اسکرین کا استعمال روزانہ ضروری ہے، جس کا ایس پی ایف کم از کم 30 ہونا چاہیے۔ اگر آپ دھوپ میں زیادہ وقت گزارتے ہیں تو ہر دو گھنٹے بعد اسے دوبارہ لگانا چاہیے۔
وٹامن سی کی اہمیت
کولیجن کی بہتر تیاری کے لیے وٹامن سی نہایت ضروری ہے۔ یہ نہ صرف جلد کے ریشوں کو مضبوط بناتا ہے بلکہ اسے نقصان دہ عناصر سے بھی بچاتا ہے۔ روزانہ صبح وٹامن سی سیرم کا استعمال جلد کی چمک بڑھانے میں مدد دیتا ہے۔ اس کے ساتھ خوراک میں ترش پھل، شملہ مرچ، کیوی اور اسٹرابیری شامل کرنا بھی فائدہ مند ہے۔
پروٹین کا کردار
چونکہ کولیجن خود ایک پروٹین ہے، اس لیے جسم کو اس کی تیاری کے لیے معیاری پروٹین درکار ہوتا ہے۔ انڈے، مچھلی، چکن، دہی اور دالیں ایسے ذرائع ہیں جو جلد کو مضبوط بنانے میں مدد دیتے ہیں۔ اس کے علاوہ بون بروتھ یا کولیجن سپلیمنٹس بھی متوازن غذا کے ساتھ مفید ہو سکتے ہیں۔
ریٹینول کا استعمال
ریٹینول ایک ایسا جز ہے جس پر کافی سائنسی تحقیق ہو چکی ہے۔ یہ جلد کے خلیات کی تجدید کو تیز کرتا ہے اور کولیجن کی پیداوار میں مدد دیتا ہے۔ تاہم اسے احتیاط سے استعمال کرنا چاہیے، ابتدا کم مقدار سے کریں اور رات کے وقت لگائیں۔ ساتھ میں موئسچرائزر اور دن کے وقت سن اسکرین کا استعمال لازمی ہے۔
چینی کا زیادہ استعمال نقصان دہ
زیادہ چینی کھانے سے ایک عمل شروع ہوتا ہے جسے گلائیکیشن کہتے ہیں، اس میں کولیجن کے ریشے متاثر ہو کر سخت ہو جاتے ہیں اور اپنی لچک کھو دیتے ہیں۔ اس لیے میٹھی اشیاء اور پراسیسڈ شکر کا استعمال کم کرنا جلد کے لیے فائدہ مند ہے۔
نیند کی اہمیت
رات کی گہری نیند کے دوران جسم اپنی مرمت کرتا ہے اور کولیجن کی پیداوار میں اضافہ ہوتا ہے۔ اگر نیند پوری نہ ہو تو جسم میں ایسے ہارمونز بڑھ جاتے ہیں جو جلد کو نقصان پہنچاتے ہیں۔ روزانہ 7 سے 8 گھنٹے اچھی نیند لینا ضروری ہے۔
ورزش کا اثر
باقاعدہ ورزش خون کی گردش کو بہتر بناتی ہے، جس سے جلد تک آکسیجن اور غذائیت بہتر انداز میں پہنچتی ہے۔ اس کے ساتھ ذہنی دباؤ بھی کم ہوتا ہے، جو جلد کی صحت کے لیے اہم ہے۔
نمی برقرار رکھنا
خشک جلد جلدی تھکی ہوئی نظر آتی ہے اور اس میں جھریاں زیادہ واضح ہوتی ہیں۔ اس لیے پانی کا مناسب استعمال ضروری ہے۔ ساتھ ہی ایسے موئسچرائزر استعمال کریں جن میں ہائیالورونک ایسڈ یا سیرامائیڈز شامل ہوں تاکہ جلد کی نمی برقرار رہے۔
آخر میں یہ بات ذہن میں رکھیں کہ 25 سال کے بعد جلد کی جوانی برقرار رکھنا کسی ایک جادوئی پروڈکٹ کا نتیجہ نہیں بلکہ روزمرہ کی چھوٹی عادات کا مجموعہ ہے۔ متوازن خوراک، مناسب نیند، سورج سے حفاظت اور مستقل دیکھ بھال ہی وہ عوامل ہیں جو جلد کو دیر تک صحت مند اور توانا رکھتے ہیں۔