دہلی ہائیکورٹ نے بھارتی اداکار راجپال یادیو کے خلاف چیک باؤنس کیس میں فیصلہ محفوظ کر لیا ہے۔
عدالت میں سماعت کے دوران جج نے راجپال یادیو کے مؤقف میں تضادات پر سوال اٹھاتے ہوئے کہا کہ ان کے دیے گئے وعدوں اور موجودہ بیانات میں واضح فرق ہے۔ شکایت کنندہ کے وکیل نے مؤقف اختیار کیا کہ اداکار سزا قبول کر چکے ہیں اور اب ذمہ داری سے نہیں بچ سکتے۔
عدالت نے فریقین کو تصفیے کی تجویز بھی دی، تاہم راجپال یادیو نے اسے مسترد کر دیا۔ انہوں نے ویڈیو لنک کے ذریعے سماعت میں شرکت کرتے ہوئے کہا ’’میں جذباتی نہیں ہوں، مجھے پانچ بار اور جیل بھیج دیں۔‘‘
واضح رہے کہ یہ تنازع 2010 سے جاری ہے، جب راجپال یادیو نے فلم سازی میں قدم رکھتے ہوئے اپنی فلم ’’اتا پتہ لاپتہ‘‘ کیلئے 5 کروڑ روپے قرض لیا تھا۔ فلم کی ناکامی کے بعد مالی تنازع بڑھ کر تقریباً 9 کروڑ روپے تک پہنچ گیا۔
یاد رہے کہ 2018 میں ٹرائل کورٹ نے راجپال یادیو کو 6 ماہ قید کی سزا سنائی تھی، جسے 2019 میں بھی برقرار رکھا گیا تھا۔