کمانڈر ایف سی این اے کا روندو کے علماء اور مشائخ کے ساتھ اہم نشست
کمانڈر ایف سی این اے نے روندو میں علماء، سول سوسائٹی کے نمائندگان اور نوجوانوں کے ساتھ ایک جامع اور بامقصد نشست کی، جس میں علاقائی صورتحال، امن و استحکام اور باہمی ہم آہنگی سے متعلق امور پر تفصیلی تبادلہ خیال کیا گیا۔ شرکاء نے بھی اپنے خیالات کا اظہار کرتے ہوئے قومی یکجہتی، رواداری اور ذمہ دارانہ طرزِ عمل کی اہمیت پر زور دیا۔
نشست کے آغاز میں کمانڈر نے رہبرِ معظم آیت اللہ خامنہ ای کی شہادت پر گہرے رنج و غم کا اظہار کرتے ہوئے تعزیت کی اور ان کی خدمات کو خراجِ تحسین پیش کیا۔ بعد ازاں بدلتے ہوئے علاقائی تناظر اور اس کے ممکنہ اثرات پر روشنی ڈالتے ہوئے اس امر پر زور دیا گیا کہ موجودہ حالات میں قومی اتحاد، تدبر اور اجتماعی ذمہ داری ناگزیر ہے۔
کمانڈر ایف سی این اے نے یکم مارچ کو پیش آنے والے افسوسناک واقعے پر تشویش کا اظہار کرتے ہوئے اس بات پر زور دیا کہ امن و استحکام کا قیام ہم سب کی مشترکہ ذمہ داری ہے۔
انہوں نے کہا کہ کسی بھی قسم کی بدامنی یا انتشار سے بچاؤ کے لیے ریاستی ادارے قانون کے دائرے میں رہتے ہوئے ضروری اقدامات جاری رکھے ہوئے ہیں، جبکہ ترجیح اس امر کو دی جا رہی ہے کہ معاملات کو افہام و تفہیم، مشاورت اور باہمی تعاون کے ذریعے مثبت سمت میں آگے بڑھایا جائے۔
اختتام پر کمانڈر نے گلگت بلتستان کے عوام کے جذبۂ حب الوطنی، قربانیوں اور ذمہ دارانہ کردار کو سراہتے ہوئے کہا کہ مقامی آبادی نے ہمیشہ قومی یکجہتی اور استحکام کے فروغ میں کلیدی کردار ادا کیا ہے، اور اسی مثبت روایت کو برقرار رکھتے ہوئے ملک کی ترقی اور پائیدار امن کے قیام میں اپنا تعمیری کردار ادا کرتی رہے گی۔