چلاس:بونر داس سول ڈسپنسری میں فری میڈیکل کیمپ، 250 مریضوں کو طبی امداد۔
تفصیلات کے مطابق آغا خان ہیلتھ سروس پاکستان اور آغا خان رولر سپورٹ پروگرام، دیامر ریجن کی جانب سے بونر داس سول ڈسپنسری میں ایک روزہ فری میڈیکل کیمپ کا انعقاد کیا گیا، جس میں 250 مریضوں میں مرد، خواتین، بچے اور ضعیف العمر افراد شامل تھے۔ کیمپ میں مریضوں کا معائنہ کیا گیا اور ضرورت کے مطابق مفت ادویات فراہم کی گئیں۔
ڈی ایچ او دیامر، صلاح الدین، نے کیمپ کے دوران کہا کہ یہ میڈیکل کیمپ علاقے کے عوام کے لیے صحت کی سہولیات تک رسائی میں ایک اہم قدم ہے۔
انہوں نے کہا کہ ایسے پروگرامز نہ صرف مریضوں کو بروقت طبی سہولیات فراہم کرتے ہیں بلکہ مقامی کمیونٹی میں صحت کے شعور کو فروغ دینے، بیماریوں کے پھیلاؤ کو روکنے اور لوگوں کی معیار زندگی بہتر بنانے میں بھی کلیدی کردار ادا کرتے ہیں۔
صلاح الدین نے مزید کہا کہ اداروں کا یہ اقدام دور دراز اور کم سہولیات والے علاقوں کے عوام کے لیے انتہائی مفید ہے اور حکومت اور سماجی اداروں کو چاہیے کہ وہ صحت کی سہولیات کے فروغ کے لیے مسلسل تعاون جاری رکھیں۔
اہلِ علاقہ نے دونوں اداروں کے اقدامات کو سراہا اور کہا کہ ایسے پروگرامز عوامی فلاح اور صحت کی بہتری کے لیے نہایت اہم ہیں، اور اس سے دور دراز علاقوں کے عوام کو معیاری طبی خدمات تک رسائی حاصل ہوتی ہے۔