وفاقی وزیر آئی ٹی شیزا فاطمہ سے صوبائی وزیر غلام عباس کی ملاقات، گلگت بلتستان میں انٹرنیٹ اور آئی ٹی مسائل پر تبادلہ خیال

اسلام آباد() وفاقی وزیر برائے انفارمیشن ٹیکنالوجی شیزا فاطمہ سے صوبائی وزیر اطلاعات و نشریات انفارمیشن ٹیکنالوجی غلام عباس نے منگل کے روز ان کے دفتر میں ملاقات کی ملاقات میں دوطرفہ امور خاص طور پر گلگت بلتستان میں انفارمیشن ٹیکنالوجی کے شعبے میں درپیش مسائل پر تبادلہ خیال کیا گیا

صوبائی وزیر اطلاعات و نشریات اور انفارمیشن ٹیکنالوجی غلام عباس نے علاقے میں عوام کو درپیش انٹر نیٹ کے ایشوز سے وفاقی وزیر برائے انفارمیشن ٹیکنالوجی شیزا فاطمہ کو آگاہ کیا اور ان کے حل کیلئے حکمت عملی وضع کرنے کی درخواست کی وفاقی وزیر برائے انفارمیشن ٹیکنالوجی شیزا فاطمہ نے صوبائی وزیر غلام عباس سے گفتگو کرتے ہوئے کہاکہ

گلگت بلتستان بہت ہی خوبصورت خطہ ہے یہاں کے عوام کو انفارمیشن ٹیکنالوجی کے میدان میں درپیش مسائل کا حل ہماری اولین ترجیح ہے خاص کر انٹر نیٹ کے حوالے سے وہاں کے عوام کو درپیش مشکلات فوری دور کی جائیں گی

تاکہ یہاں کی خوبصورتی کو سوشل میڈیا کے ذریعے دنیا میں اجاگر کیا جاسکے اور ملکی و غیر ملکی سیاحوں کو اس علاقے کی جانب سے لایا جاسکے اس حقیقت سے انکار ممکن نہیں ہے کہ آئی ٹی کی دنیا میں جب تک آگے بڑھا نہیں جائے گا تب تک علاقے کی ترقی و خوشحالی ممکن نہیں ہوگی گلگت بلتستان کے عوام کو ہمارا پیغام پہنچائیں گے کہ ہم اس خطے میں انفارمیشن ٹیکنالوجی کے شعبے کی ترقی کیلئے تمام تر وسائل بروئے کار لائیں گے جن علاقوں میں انٹر نیٹ کی سہولت موجود نہیں ہے

وہاں انٹر نیٹ کی سہولت کی فراہمی کیلئے بھی کوششیں کی جائیں گی تاکہ گلگت بلتستان کے دورافتادہ علاقوں کے لوگوں کو رابطہ کاری میں کسی قسم کی کوئی مشکل پیش نہ آئے دریں اثناء صوبائی وزیر غلام عباس نے ملاقات کے دوران وفاقی وزیر برائے انفارمیشن ٹیکنالوجی شیزا فاطمہ سے کہاکہ

گلگت بلتستان زمین پر جنت کا ایک ٹکرا ہے اس علاقے میں انٹر نیٹ کا نظام بہتر ہوا تو علاقے کے لوگوں کے علاؤہ ملکی و غیر ملکی سیاحوں کو بھی بڑا فائدہ ہوگا اور اس علاقے کی سیاحت بہت ترقی کرے گی علاقے کی ترقی سیاحت کی ترقی سے منسلک ہے

بہت سارے علاقے ایسے ہیں جہاں آج بھی انٹر نیٹ کی سہولت موجود نہیں ہے جن علاقوں میں یہ سہولت موجود ہے وہاں رفتار بہت سست ہے لہذا اس نظام کو موثر بنانے کی اشد ضرورت ہے وفاقی وزیر نے صوبائی وزیر کو یقین دلایا ہے

کہ وہ اس سلسلے میں اپنی صلاحیتیں بروئے کار لائیں گی اور گلگت بلتستان کے عوام کو بہتر انٹر نیٹ کی سہولت فراہم کی جائے گی