گلگت :صوبائی ایمرجنسی آپریشن سینٹر (PEOC) گلگت بلتستان نے محکمہ موسمیات کی رپورٹ کے پیشِ نظر خطے میں شدید بارشوں اور برفباری کا الرٹ جاری کرتے ہوئے سیاحوں اور مقامی شہریوں کو محتاط رہنے کی ہدایت کی ہے۔ایڈوائزری کے مطابق 23 جنوری سے 26 جنوری 2026 تک گلگت بلتستان کے بیشتر اضلاع بشمول دیامر، استور، غذر، سکردو، ہنزہ، گلگت، گانچھے، شگر، کھرمنگ اور نگر میں وسیع پیمانے پر بارش اور وقفے وقفے سے شدید برفباری کا امکان ہے۔
صوبائی انتظامیہ نے خبردار کیا ہے کہ شدید موسمی صورتحال کے باعث درج ذیل خطرات پیدا ہو سکتے ہیں نشیبی علاقوں اور وادیوں میں برفانی تودے گرنے کا شدید خطرہ۔ پہاڑی راستوں اور حساس مقامات پر مٹی کے تودے گرنے کا خدشہ۔ قراقرم ہائی وے (KKH)جگلوٹ سکردو روڈ (JSR) اور دیگر اہم شاہراہوں پر ٹریفک کی روانی متاثر ہو سکتی ہے اس کے علاوہ سڑکوں پر شدید پھسلن کے باعث حادثات کا خطرہ بڑھ سکتا ہےپی ای او سی نے تمام ضلعی انتظامیہ ڈی ڈی ایم اے (DDMA) اور متعلقہ اداروں بشمول ریسکیو 1122 اور ہیلتھ ڈیپارٹمنٹ کو ہائی الرٹ پر رہنے کا حکم دیا ہے۔
این ایچ اے (NHA) اور ایف ڈبلیو او (FWO) کو سڑکوں کی بروقت صفائی اور مشینری کی دستیابی یقینی بنانے کی ہدایت کی گئی ہے۔جاری ایڈوائزری میں سیاحوں اور مسافروں کو سختی سے کہا گیا ہے کہ وہ شدید برفباری کے دوران غیر ضروری سفر سے گریز کریں اور سفر شروع کرنے سے پہلے موسمی حالات اور سڑکوں کی صورتحال کے بارے میں تازہ ترین معلومات حاصل کریں.