شمالی افغانستان میں شدید طوفانی برفباری نے نظامِ زندگی مفلوج کر دیا ہے، مختلف صوبوں میں پیش آنے والے حادثات میں کم از کم 11 افراد جاں بحق ہو گئے جبکہ متعدد افراد برف میں پھنسے ہونے کی اطلاعات ہیں۔
افغان میڈیا کے مطابق سالنگ پاس، فریاب، پروان، میدان وردگ اور بامیان کے علاقوں میں کئی فٹ برف پڑنے سے اہم شاہراہیں بند ہو گئیں، جس کے باعث کابل کا شمالی صوبوں سے زمینی رابطہ منقطع ہو چکا ہے۔
برفانی تودے گرنے کے واقعات میں گاڑیاں دب گئیں جبکہ دیہی علاقوں میں مکانات کو بھی نقصان پہنچا۔
مقامی انتظامیہ کے مطابق خراب موسم، شدید سردی اور بند راستوں کے باعث امدادی ٹیموں کو متاثرہ علاقوں تک پہنچنے میں مشکلات کا سامنا ہے۔
شہریوں کو غیر ضروری سفر سے گریز کی ہدایت کی گئی ہے جبکہ موسمیاتی اداروں نے آئندہ چند روز مزید برفباری کی پیش گوئی کی ہے۔
حکام کا کہنا ہے کہ راستوں کی بحالی اور متاثرین کو امداد فراہم کرنے کے لیے کوششیں جاری ہیں۔