گلگت: وزیرِ داخلہ گلگت بلتستان ساجد علی بیگ نے چیف سیکریٹری گلگت بلتستان سے اہم ملاقات کی، جس میں چُپُرسان میں زلزلے سے متاثرہ خاندانوں کے لیے فوری امداد اور مکمل معاوضے کی فراہمی پر تفصیلی مشاورت کی گئی۔
ملاقات میں اس امر پر اتفاق کیا گیا کہ متاثرین کو ہونے والے تمام نقصانات کا ازالہ حکومت کی جانب سے کیا جائے گا۔ وزیرِ داخلہ کل چُپُرسان کا دورہ کریں گے اور متاثرہ علاقوں کا زمینی جائزہ لیں گے۔
اجلاس میں شاہراہِ قراقرم (KKH) پر مسافروں کو درپیش مشکلات، خصوصاً سفری اوقات کے مسائل پر بھی گفتگو ہوئی۔ مزید برآں بجلی کی تنخواہوں سے کٹوتی کے مسئلے کے حل اور بجلی کے میٹرز کی تنصیب کے حوالے سے بھی غور کیا گیا، جبکہ متعلقہ محکموں کو ہدایات جاری کر دی گئی ہیں کہ سرکاری ملازمین بجلی کے میٹر اپنے گھروں میں نصب کریں اور تفصیلات شیئر کریں، تاکہ غیر قانونی استعمال کی روک تھام ممکن ہو سکے۔
عوامی شکایات کے ازالے اور شفافیت یقینی بنانے پر بھی زور دیا گیا۔