گلگت :پولیس خدمت مراکز گلگت بلتستان نے سروس ڈیلیوری کے شعبے میں شاندار کارکردگی کا مظاہرہ کرتے ہوئے سال 2025 کے دوران خدمات کی فراہمی میں مجموعی طور پر 21 فیصد اضافہ ریکارڈ کیا ہے۔
اعداد و شمار کے مطابق یکم جنوری تا 31 دسمبر 2024 کے دوران پولیس خدمت مراکز کے ذریعے 33,456 شہریوں کو مختلف سہولیات فراہم کی گئیں، جبکہ سال 2025 میں یہ تعداد بڑھ کر 40,629 تک جا پہنچی، جو کہ نمایاں پیش رفت کا مظہر ہے۔
تفصیلات کے مطابق سال 2024 میں 4,608 کریکٹر سرٹیفکیٹس اور 28,848 ڈیجیٹل ملازم تصدیقی رپورٹس (Employee Verification) جاری کی گئیں، جبکہ سال 2025 میں 7,453 کریکٹر سرٹیفکیٹس اور 33,176 ڈیجیٹل ایمپلائی ویریفیکیشن رپورٹس جاری کی گئیں۔
یہ تمام سہولیات گلگت بلتستان کے 10 اضلاع میں قائم پولیس خدمت مراکز کے ذریعے عوام کو بالکل مفت فراہم کی جا رہی ہیں، جس سے شہریوں کو نہ صرف وقت کی بچت ہو رہی ہے بلکہ شفاف اور بروقت خدمات کی فراہمی بھی ممکن ہو رہی ہے۔
پولیس خدمت مراکز کی اس شاندار کارکردگی کا سہرا جدید ڈیجیٹل ٹرانسفارمیشن کو جاتا ہے، جس کے تحت دستی فائلوں کے پرانے نظام کی جگہ ریئل ٹائم ڈیجیٹل ویریفیکیشن سسٹم متعارف کروایا گیا ہے، تاکہ عوام کو مزید شفاف اور مؤثر خدمات فراہم کی جا سکیں۔