ہزہائنس شاہ رحیم الحسینی آغا خان پنجم نے اعلیٰ تعلیم تک رسائی کو مزید آسان بنانے کے لیے ایک تاریخی فیصلہ کرتے ہوئے طویل عرصے سے جاری میرٹ پر مبنی انڈرگریجویٹ اسکالرشپ پروگرام کو مکمل طور پر گرانٹ میں تبدیل کرنے کا اعلان کر دیا ہے۔
یہ اعلان انہوں نے کل پرتگال کے شہر لزبن میں کیا۔
اس فیصلے کے تحت موجودہ اور سابقہ اسکالرشپ حاصل کرنے والے تمام طلبہ کے بقایاجات (قرضے) بھی معاف کر دیے جائیں گے۔
یہ اسکالرشپ پروگرام منتخب ممالک میں آغا خان ایجوکیشن بورڈز کے زیرِ انتظام چلایا جا رہا تھا اور اسے 1990 کی دہائی میں آغا خان چہارم مولانا شاہ کریم نے قائم کیا تھا۔ گزشتہ تین دہائیوں کے دوران اس پروگرام کے ذریعے ہزاروں طلبہ نے گرانٹ اور قابلِ واپسی قرض کی مدد سے گریجویشن کی تعلیم حاصل کی۔
جماعت سے خطاب کرتے ہوئے شاہ رحیم الحسینی آغا خان نے کہا کہ یہ فیصلہ ان کی اس خواہش کا مظہر ہے کہ معیاری اعلیٰ تعلیم کے حصول میں حائل مالی رکاوٹوں کو ختم کیا جائے۔ اسکالرشپس کو مکمل گرانٹ میں تبدیل کرنے سے آئندہ مستفید ہونے والے طلبہ کو کسی قسم کی واپسی کی ذمہ داری نہیں اٹھانا پڑے گی۔
متعلقہ ممالک میں آغا خان ایجوکیشن بورڈز جلد ہی اس فیصلے پر عمل درآمد اور اہلیت سے متعلق مزید تفصیلات جاری کریں گے۔